एजेन्सी-किसानका मागको समर्थनमा संयुक्त किसान मोर्चालगायतका किसान संगठनहरूले आज भारत बन्दको घोषणा गरेका छन्।
संयुक्त किसान मोर्चाले किसानको मागलाई समर्थन गर्ने सबै संगठनलाई भारत बन्द गर्न अपिल गरेको छ । त्यसमा देशभरका केही श्रमिक संगठनको पनि सहभागिता रहनेछ । यस्तै कैयौ ट्रक एसोसिएशनदेखि ट्रेड यूनियन पनि बन्दमा सहभागी हुनेछन् ।
यस बन्दमा सहभागी हुन दिल्लीतर्फ लागेका पञ्जाबका केही किसानहरूलाई हरियाणामा अम्बाला नजिकै रोकिएको छ । उनीहरुलाई रोक्न सुरक्षाकर्मीले अश्रुग्यास प्रहार गरेका थिए ।
भारत बन्दलाई मध्यनजर गर्दै राजधानी दिल्लीलगायत धेरै राज्यमा व्यापक सुरक्षा व्यवस्था गरिएको छ । दिल्ली पुलिसका अनुसार प्रदर्शनकारीलाई दिल्ली प्रवेश गर्नबाट रोक्नका लागि पूर्ण व्यवस्था गरिएको छ भने पञ्जाबदेखि हरियाणा, दिल्लीदेखि यूपीसम्म हाई अलर्ट जारी गरिएको छ ।
किसानको अर्को संगठन संयुक्त किसान मोर्चा (गैरराजनीतिक) ले पनि भारत बन्दमा सहभागी हुन जनतालाई अपिल गरेको छ ।
किसान संगठन र भारत सरकारबीच हिजो भएको तेस्रो चरणकाे वार्ता पनि असफल भएको थियो । न्यूनतम समर्थन मूल्यका लागि कानुन बनाउनुपर्ने उनीहरुको प्रमुख माग छ ।
