मुग्लिन (चितवन)- शक्तिखोर–फिस्लिङ सडकखण्डअन्तर्गत कालिका नगरपालिका–९ को कोलारडाँडामा ढुङ्गासहित खसेको पहिरो हटाइएपछि अवरुद्ध सडक पुनः सञ्चालनमा आएको छ ।
सडकमा खसेका ठूला ढुङ्गा र पहिरो हटाई दुईतर्फी सडक सञ्चालन गरिएको कालिका नगरपालिकाका प्रमुख विनोद रेग्मीले जानकारी दिनुभयो । पहिरोको जोखिम रहेकाले शक्तिखोर हुँदै उपरदाङगढी, मायाटारलगायतका क्षेत्रमा आवतजावत गर्ने यात्रु तथा सवारी चालकलाई उच्च सतर्कता अपनाएर मात्रै यात्रा गर्न उहाँले अनुरोध गर्नुभयो ।
नगरप्रमुख रेग्मीले बर्खायाममा उक्त सडकखण्डमा यात्रा गर्दा विशेष सावधानी अपनाउन आग्रह गर्दै भन्नुभयो, “बर्खाको समय भएकाले यो क्षेत्रमा यात्रा गर्ने सबै यात्रुले संयमित र सुरक्षित ढङ्गले यात्रा गर्नुहोला ।”
पहिरोका कारण चितवनको इच्छाकामनाका पर्यटकीयस्थल पुरानो सदरमुकाम ऐतिहासिक किल्ला उपरदाङगढी, मायाटार, घुर्केसलगायतका क्षेत्रमा आवतजावत गर्ने पर्यटक बाटोमा अलपत्र परेका थिए । गर्मी मौसम सुरु भएसँगै यस क्षेत्रमा पर्यटकको आवागमन बढ्ने गर्छ । बर्खा लागेसँगै सडकमा पहिरो खस्ने भएकाले शक्तिखोर–फिस्लिङ सडकको यात्रा जोखिमपूर्ण रहेको छ ।
