काठमाडौं । नेपाली कांग्रेसको विशेष महाधिवेशनलाई मान्यता दिने निर्वाचन आयोगको निर्णयविरुद्ध नेपाली कांग्रेसका निर्वतमान सभापति शेरबहादुर देउवा पक्ष अदालत गएको छ।
देउवा समूहले आज सर्वोच्च अदालतमा रिट दर्ता गरेको हो। नेपाली कांग्रेसका निर्वतमान सभापति शेरबहादुर देउवासहित निवर्तमान कार्यवाहक सभापति पूर्णबहादुर खड्काले वारेसमार्फत आइतबार सर्वोच्चमा रिट दायर गर्नुभएको छ। रिटमा निर्वाचन आयोग, विशेष महाधिवेशनबाट सभापतिमा निर्वाचित गगनकुमार थापा, उपसभापतिमा निर्वाचित विश्वप्रकाश शर्मासहित सम्पूर्ण केन्द्रीय समितिलाई विपक्षी बनाइएको छ।
संविधान, कानुन र पार्टी विधानविपरित आयोगले दिएको आधिकारिताविरूद्ध आफूहरूले न्यायका लागि सर्वोच्च अदालतमा रिट दायर गर्नुपरेको नेता पूर्णबहादुर खड्काले बताउनुभयो। उहाँले संविधान, कानुन र विगतका नजिरको खिलाफमा गरिएको आयोगको निर्णय बदर गर्दै अदालतले आफूहरूलाई न्याय दिने दाबी समेत गर्नुभयो ।
