काठमाडौं । चितवनबाट काठमाडौँ भ्रमण गएर फर्कंदै गरेका विद्यार्थी बोकेको बस धादिङमा दुर्घटना हुँदा ७ विद्यार्थी घाइते भएका छन् । पृथ्वी राजमार्गअन्तर्गत धादिङको धुनिबेसी–६ चालिसेमा स्कुल बससहित चार वटा बस, दुई वटा ट्रक र एउटा मोटरसाइकल दुर्घटनामा परेका हुन्।
जिल्ला प्रहरी कार्यालय धादिङका प्रहरी नायव उपरीक्षक प्रकाश दाहालका अनुसार भारतीय नम्बर प्लेटको ट्रकको ब्रेक फेल भएपछि अन्य सवारीलाई ठक्कर दिँदा दुर्घटना भएको हो।
दुर्घटनामा परेको बस चितवनको कालिका नगरपालिका वडा नं. ६ मा रहेको माध्यमिक विद्यालय रेडक्रसग्रामको स्कुलबस रहेको खुलेको छ । कक्षा ८, ९ र १० का विद्यार्थीहरुलाई दुई दिने शैक्षिक भ्रमणमा लिएर गएको बस दुर्घटनामा परेको हो ।
४३ जना विद्यार्थी र ४ जना शिक्षक बसमा सवार रहेकामा ७ जना विद्यार्थी घाइते भएका विद्यालयका प्रधानाध्यापक नन्दलाल लामिछानेले जानकारी दिए । घाईते मध्ये २ जनालाई उपचारको लागी काठमाडौँ पठाईएको छ।
घाईते विद्यार्थीहरुको उपचार र उद्धारको लागी आवश्यक समन्वय र पहल भईरहेको कालिकाका मेयर विनोद रेग्मीले जानकारी दिए।
