काठमाडौं । नर्भिक इन्टरनेशनल हस्पिटल लिमिटेडले सर्वसाधारणका लागि जारी गरिने २५ लाख कित्ता साधारण शेयर निष्काशन गर्न निष्काशन तथा विक्री प्रवन्धकमा लक्ष्मी सनराइज क्यापिटल लिमिटेडलाई नियुक्त गरेको छ।

उक्त सम्झौतामा नर्भिक इन्टरनेशनल हस्पिटल लिमिटेडका तर्फबाट प्रमुख कार्यकारी अधिकृत अजयकुमार मिश्र र लक्ष्मी सनराइज क्यापिटल लिमिटेडका तर्फबाट प्रमुख कार्यकारी अधिकृत विजयलाल श्रेष्ठले हस्ताक्षर गर्नुभएको छ ।

नर्भिक इन्टरनेशनल हस्पिटल लिमिटेड, नेपाल र नेपालबाहिरका बिरामीका लागि गुणस्तरीय स्वास्थ्य सेवामा विश्वसनीय नाम हो। नर्भिकले सन् १९९३ मा ३० शय्याको सामान्य सुविधाको रुपमा आफ्नो यात्रा सुरु गरेको थियो र अहिले २०० शय्याको बहु-विशेषज्ञ अस्पतालको रुपमा सञ्चालनमा छ । यो ३ सय शय्याको अस्पतालमा स्तरोन्नति गर्ने प्रक्रियामा छ, जुन नेपालको पहिलो र अग्रणी कर्पोरेट अस्पतालको रुपमा  रहेको छ । अस्पतालले अत्याधुनिक पूर्वाधार, चिकित्सा प्रविधि, दक्ष जनशक्ति तथा निरन्तर लगानीको साथ, विरामीहरुले काठमाडौंमा नै विश्वव्यापी स्तरको हेरचाह प्राप्त गर्ने कुरा सुनिश्चित गर्दै आएको छ ।