काठमाडौं । सुप्रिम सहकारीमा रकम हिनामिना प्रकरणमा आफ्नो नाम मुछिएपछि  उपप्रधानमन्त्री तथा गृहमन्त्री रवि लामिछानेले आफ्नो नाममा फर्जी ऋण प्रवाह भएको दाबी गरेका छन् । 

मंगलबार साँझ सामाजिक सञ्जाल फेसबुकमा स्टाटस लेख्दै गृहमन्त्री लामिछानेले आफ्नो संलग्नता अस्वीकार गर्दै आफ्नो नाममा फर्जी खाता बनाएर ऋण प्रवाह भएको जिकिर गरेका हुन् ।

आफ्नो व्यक्तिगत खातामा सहकारीको पैसा नआएको उनको दाबी छ । ऋण खाता खोल्दा नागरिकता, ऋण माग गरेको फाराम, केवाईसी फर्म, तीनपुस्ते विवरणलगायत कुनै विवरण अनुसन्धानले फेला नपारेको भन्दै ऋण नलिएको जिकिर लामिछानेको छ  ।

अभियोगपत्रमा आफूमाथि कुनै आरोप पुष्टि नभएको र नाम मात्रै लेखिदिएकाले कारबाहीको भागी नहुने उनको प्रस्टीकरण छ ।