काठमाडौं । बलिउडमा ही-म्यानका रुपमा प्रख्यात दिग्गज अभिनेता धर्मेन्द्रको ८९ वर्षको उमेरमा निधन भएको छ । उनको मुम्बईस्थित आफ्नै निवासमा निधन भएको हो । दुई साताअघि मात्रै धर्मेन्द्रलाई अस्पतालबाट घर फिर्ता ल्याइएको थियो । 

सन् १९६० देखि अभिनय यात्रा सुरू गरेका धर्मेन्द्रले तीन सयभन्दा धेरै चलचित्रमा अभिनय गरेका छन् । 'शोले' मा बहुचर्चित वीरूको भूमिकासहित 'फूल और पत्थर', 'सीता और गीता', 'चुपके चुपके', 'प्रतिज्ञा' र 'धर्म वीर' जस्ता उनका लचित्र सदाबहार मानिन्छन् । रोमान्टिकदेखि एक्सन हिरोसम्मको भूमिकामा उनले आफ्नो बलियो छाप छाडेका छन् । 

सन् १९९७ मा फिल्मफेयर लाइफटाइम अचिभ्मेन्ट र २०१२ मा भारत सरकारको पद्मभूषण सम्मान पाएका धर्मेन्द्र पछिल्लो पटक 'तेरी बातों में ऐसा उलझा जिया' र 'रकी और रानी की प्रेम कहानी' मा देखिएका थिए । उनको अन्तिम चलचित्र 'इक्किस' प्रदर्शन हुन बाँकी छ । यो फिल्मको पोस्टर आइतबार मात्र सार्वजनिक गरिएको थियो ।

धर्मेन्द्रका श्रीमतीहरू प्रकाश कौरका तर्फ सनी र बबी देओलसहित ४ सन्तान तथा हेमा मालिनीतर्फ ईशा र आहाना देओल छन् ।