जनकपुर । बिरामीको बहाना गर्दै जनकपुर छोडेकी मधेश प्रदेश प्रमुख सुमित्रा भण्डारीले भूमिगत शैलीमा एमालेका सरोज यादवलाई मुख्यमन्त्री नियुक्त गरेपछि भण्डारीको चौतर्फी आलोचना भएको छ ।
भण्डारीले बिहान बर्दिवासको पानस कटेज पुगेर यादवलाई मुख्यमन्त्रीमा नियुक्त गरेकी हुन् ।
भण्डारीले आज बिहान संविधानको धारा १६८ को उपधारा ३ बमोजिम मधेश प्रदेशको मुख्यमन्त्रीमा ठूलो दलको हैसियतले एमालेका संसदीय दलका नेता सरोज यादवलाई नियुक्त गरेकी हुन् ।
बर्दिवासको कालापानीस्थित होटल पानसमा सोमबार बिहान ५ बजेर २० मिनेटमा यादवलाई मुख्यमन्त्री पदको शपथसमेत गराइएको छ । होटलमै एमाले प्रदेशसभा सदस्य लखन दास तत्मा, नेपाल संघीय समाजवादी पार्टीकी प्रदेशसभा सदस्य बिमला अंसारी र राप्रपाकी प्रदेशसभा सदस्य कंचन बिच्छालाई विना विभागीय मन्त्रीको शपथ पनि गराइएको छ ।
यसअघि प्रदेश प्रमुख भण्डारीलाई कांग्रेससहित ७ दलले संविधानको धारा १६८ को उपधारा २ बमोजिम दुई वा दुई भन्दा बढी दलले सरकार बनाउन भन्दै आह्वान गर्न दबाब दिइरहेका थिए । एमालेले पनि संविधानको धारा १६८ को उपधारा ३ बमोजिम सरकार गठन हुनुपर्ने भन्दै जनकपुरस्थित प्रदेश प्रमुखको कार्यालयमा नाराबाजी गरेको थियो ।
आइतबार साँझ प्रदेश प्रमुख भण्डारीले नेपाली कांग्रेस, माओवादी, लोसपा, नेकपा एस, जनमत र जसपाका प्रदेशसभा सदस्यहरुसँग भेटर २/३ जना विज्ञहरुसँग छलफल गरी मात्रै निर्णय लिने प्रतिबद्धता जनाएकी थिइन् । तर आज बिहान ३ बजे उपचारका लागि काठमाडौं जान लागेको भन्दै जनकपुरस्थित मधेश प्रदेश प्रमुखको भवनबाट निस्केर उनी बर्दिवासको पानस होटलमा पुगेकी थिइन् ।
